SAUNOAGA A LE AFIOGA I LE SUI PALEMIA, HON. TUALA TEVAGA IOSEFO PONIFASIO I LE TATALAINA O LE MALAE TA’ALO A VAIALA
SAMOA, December 18 - Aso Faraile, 15 Tesema 2023
E mua’i utufia le matapuna i vaivao e pei ole matamataga i le vaisuli o le Tuiatua aua ua lologo i Papaofo le lupe a Lafaiali’i ina ua togo malama ma fotupule le faiva o tama i lo outou soifua laulelei ma so matou ola vaivai ona ole alofa male agalelei taumulimuli o le Atua soifua. Ua faamalo pale, ua faamalo le lagi matafi.
Lau Susuga i le ta’ita’i o le sauniga, Susuga Reverend Iese Uele,
Afifio afioga i Minisita o le Kapeneta ma Minisita Lagolago,
Afio lau afioga ile Ta’ita’i ole Itu Agai,
Afifio Faipule uma o le Maota ole Palemene o Samoa,
Susü Faauluuluga o Matagaluega uma ale Malo,
E le vaea le fala o’oto i le paia maualuga o le tafatolu o le Malo tutoatasi
o Samoa i le Pulega Faatonu, Sui mamalu o le Fa’amasinoga male ofisa o
Faamasinoga,
Afifio le mamalu o Sui o Malo mai fafo o loo fai paaga ma le malo o Samoa,
Le mamalu o Faauluuluga o Faipisinisi, ma kamupani tumaoti a le Malo o Samoa,
E’eta’i le mamalu ma le paia o le ma’ave eseese ua aofaga potopoto mai i le Malae o le Ulalei i Vaiala nei, afifio maia ma tala mai aao.
Fa’afetai i le susuga i le Ta’ita’i o le sauniga, talitonu ua i luma o le Atua la tatou fa’amua ma la tatou fa’asagi, ma e le taumate ua o se pua e ‘ula i lana silasila la tatou fa’afetai, fa’asifoga, ma mo’omo’oga e pei ona saunoa i ai lau susuga
Rev. Iese Uele. Fa’amalo le fogafoga, fa’afetai tapena mae’ae’a i lau susuga, ia mana pea lau tatalo ma ia iai pea lana fa’au’uga i luga o lau susuga, aua le fe’au folafola o le Talalelei, ia tele ni agaga e fa’au’uina aua le Atua ma lona finagalo.
E ia te a’u le ava ma le fa’aaloalo ona ole avanoa ua ou maua, ua mafua ai ona lolotauama se leo i lenei tauafiafi o faiva. O le vi’iga lava lea e fa’afo’i i le Atua o Samoa ma le lalolagi atoa. Ana le seanoa lona alofi’a’ao leoleo, ua tatou feiloa’i ai i luma o nu’u, ae le o tua o nu’u. A lea ua nofofala le ‘ailua e pei o le tala i le taulafoga, ua mafua ai ona tatou ‘oa’oa i Faleseu nei, ae sa’a i ma’aomalie.
Ua atoa tupe i le fafao, ua atoa foi tino o le tama. Ua gase i utuma’au le lupe sa tagifau i le ala aua se manuia o Vaiala mo a taeao. Lea sa tatou fagota i le sao, ae faiva i le liuloa pe tua ma ni a le seuga. A lele ua malie le silamiõ, ae mata e fia vaai le va’a o Inu nai le saofa’iga malõ, i le matagofie ma le lelei ona tapenaina faa-fafine to’aga le malae i Fa’atoialemanü, e afio ai le Matua ia Tofaeono, ae a le Malae i Tapuotaota ma Laloaniuē, e afifio ai Asi ma Patu, ae alalata’i ai i la’ua na ta’i, Tamapua ma Manogiamanu, ma le mamalu i le nofo-a-ituaiga ia Fuata ma Gafa. O le mea moni, o le a matuā aogā lenei atina’e lelei ma le matagofie, mo tupulaga e le gata i le taimi lenei, ae fa’apea foi i tupulaga fai mai i le lumana’i, fa’apea ma füaga o lo’o lalovaoa.
E momoli atu ai fo’i le fa’afetai tele i pisinisi uma ma tagata ta’ito’atasi, sa taua’aoina maia ni fesoasoani (sponsors) i le fa’atupeina ma le fa’atinoina o lenei atina’e taua. Ana le seanoa la outou lagolagosua e le mafai ona fa’ataunu’uina lenei faamoemoe.
Ia fa’amanuia mai le Atua i lenei malae o “VAIALA ‘ULALEI”. Ia malu puipuia i ona ‘a’ao agalelei i latou uma o le a fa’aaogaina, ma ia saga si’itia ai pea le atina’e o ta’aloga, ma fa’alototeleina ai i latou o le a fa’aaogaina lenei atina’e taua ma le matagofie.
I lenei afiafi, ou te faapea atu ai, ua tatalaina aloaia ai nei le malae ta’alo o “Vaiala Ulalei” ma ia fa’amanuia mai le Atua i fuafuaga uma o lenei afiafi.
Soifua ma ia manuia !!
Legal Disclaimer:
EIN Presswire provides this news content "as is" without warranty of any kind. We do not accept any responsibility or liability for the accuracy, content, images, videos, licenses, completeness, legality, or reliability of the information contained in this article. If you have any complaints or copyright issues related to this article, kindly contact the author above.
